"GIHIGUGMA TIKA..."

Gihigugma tika dili tungod sa imung pitaka nga puno sa kwarta
Dili tungod sa awto nga gigama gikan sa lata
Dili tungod sa mga interes nga permi gikwenta
Kun di tungod sa imung tiunay nga gugma nga daw mura ku'g gikulata.

Gihigugma tika dili tungod sa imung pamorma
Dili tungod sa negosyo sa imung papa ug mama
Dili tungod sa inyung dako nga uma
Kun di tungod sa tinud-anay nga pag-amuma.

Gihigugma tika tungod sa imung permanenting presensya
Ug tungod sa imung taas nga pasensya
Gihigugma tika tungod sa imung dako nga katawa
Labi na kung ang hinungdan ang akong mga komedya.

Gihigugma tika tungod sa way hunong nga pagsabot sa akoa
Tungod usab sa kanunay'ng pagpaminaw bisan sa storya nga wa'y kwinta
Gihigugma tika tungod sa way puas nga suporta
Ug labi sa tanan, gihigugma tika sama sa akong pamilya.

"Walay Padulngan"

Buot kung ipahibalo nga ako nasakitan
Kung ikaw anaa'y laing kauban
Di ko ganahan ma-apektuhan
Apan unsaon ta man nga naigo man sa pana ni'ng akong dughan.

Sugod karon ikaw akong likayan
Kung mahimo pa gali ikaw di na tinggan
Kahibaw ko ikaw way pakialam
Halos man gani di ko nimu makit-an.

Puno ug kasakit ni'ng dughan
Daw kaugalingon wa na nailhan
Tungod ni'ng pagbating niturok ug way padulngan.
Hangtud asa kaha ang utlanan niini'ng gugma'ng daw mura'g gitago sa kaban?

Pagbati'ng di masulti sa uban mao'ng isuwat kutob mahuman.
Imu ba kaha ning mahibaw-an?
Kini'ng pagbating sud sa dughan.
Angay nalang ba kaha ni'ng kalimtan ug ililong nalang sa uban?

NGANU?

Unsa'y nahitabo?
Nganung naghinay-hinay ug palayo?
Ug ako gibiyaan mo nga nagmuyo
Anaa ba ako'y sala nga nahimo?

Ingon ka mas maayu'ng layu ta
Kay mas malipay tang duha
Ug karun'g wa na ka
Ako'ng nabati ang kaguol nga way sama.

Nganu'ng karon pa man'g panahuna?
Nga "okay" na unta ang tanan sa atoa
Ang atu'ng pangandoy sauna
Kalit lang' nawala mura'g buwa

Sayang tu'ng panahuna
Nga kita nag-uban pa
Nga malipayun sa usag-usa
Ug gisaw-anan ang gugma'ng way sama.

Apan karon wala na
Ang tam-is nga gugma
Hinaut nga malipay ka
Ug makit-an ang taw nga para sa atua. :(

"KARON UG ANG SAUNA"

Dugay na nga kaila
Apan wa'y paki sa usag-usa
Sa pagtagad naglisod pa
Sa pagtoo nga garboso ka.

Sa wa lang damha, nag "friend request" ka sa akua
Ug sa diha dayun gi "accept" ka kay ikaw akong kaila
Ako na hinuon'g nahunahunaan ang sauna,
       nga makita ka ikalipay na
Ug ako karun nagkatawa kung unsa tu'ng pagkahitabua.

Karon ako'ng napamatud-an
Pagdagan sa panahun dili matag-an
Bisan ni kinsa man pwera nalang sa mananag-an
Kinsa ma'y magtoo nga pagbati sa usag-usa itug-an.

Karun nahitabo na nga ikaw akua ug ako imuha
Nanghinaut nga ampingan ang gugma'ng dugay na'ng gitipigan
Buot ko nimu'ng mahibaw-an nga ikaw gisaligan ug unta di sayangan
Ug ako usab nga paningkamutan nga mabarugan ang relasyun nga gisudlan. BOW!

Panghinaut

Kasing-kasing paminawa
Isugid pinaagi ni'ng suwata
Alang sa taw'ng paasa
O! ikaw nga gabasa.

Imu ku'ng gipakatawa
Ug gipakilig pa panagsa
Hasta'ng maayuha!
Nahulog gud ku'g kausa.

Ako naa'y pangutana
Sa pagsabut, ayaw laina
Nakahuna-huna ba ka,
Nga maganahan ka naku bisan kausa?

Ako karon nagkatawa kay Decembre na
Nanghinaut makauban ka bisan karon'g paskuha
Naa ba'y "chansa" nga ikaw ma-akoa?
Kay ikalipay ko na karung panahuna.

Matud pa sa karaan'g kanta
Maghigugmaay kita kay pasko na!
Dawata ni'ng akong gugma
Ug nanghinaut nga makabantay ka ! BOW!

PAGBATI'NG TINAGUAN

Pagbati'ng way padulngan
Buot ko nang kalimtan
Kay kasing-kasing ra'y masakitan
Kung mupuyo'g dugay sa dughan.

Nganu'ng ikaw man ang ganahan
Naa man unta'y lain'g nakit-an
Mura ko'g giduwaan
Sa panahon nga sungugan.

Ako, Ikaw! ang ganahan
Apan mahadlok ko nga mahibaw-an
Kay ikaw naa'y laing ganahan
Ug gipanganduy nga makauban.

Daw kalibutan akong gipas-an
Nga imung pagbati gipanag-iya sa uban
Kanus-a ba gayud ka mutaliwan
Niini'ng dughan'g ikaw ray ganahan?

Adlaw gabi-i ikaw ang gihuna-huna
Naghandum nga ikaw pirmi'ng makita
Kay ikaw man ang bugtong kalipay
Niini'ng masulub-on kong dughan'g puno sa kalaay.

Karun, akong na huna-hunaan
Kaugalingon ra'y gipasipad-an
Tungod ni'ng pagbati'ng wa'y katubagan
Kini ang takna nga Ikaw kalimtan ni'ng akong panumduman ug papasun sa akong dughan.